2020 йилнинг 26 февралигача Самарқанд вилоятига жами 370 нафар киши Хитойдан келишган. Уларнинг 347 нафарида 14 кунлик муддат ўтганлиги сабабли тиббий кузатув тугатилган. 23 нафарида тиббий кузатув давом эттирилмоқда, дея хабар берган вилоят санитария-эпидемиологик осойишталик марказининг эпидемиологик мониторинг ва профилактик тадбирларни ташкил қилиш бўлими мудири К.Саъдуллаев.

Жорий йилнинг 26 февралигача Самарқанд халқаро аэропорти санитар назорат пункти орқали жами 304 та рейслар келиб-кетган бўлиб, 21179 нафар йўловчилар ўтказилган, шундан 1345 нафари чет эл фуқаролари, 53 нафари ХХРдан келган фуқаролар, Жартепа санитар-назорат пункти орқали 2691 та автотранспорт воситалари ўтган бўлиб, 22832  нафар йўловчиларнинг 13658  нафари чет эл фуқароларидир. Юқумли касалликларга гумон қилинган беморлар аниқланмаган.

Бундан ташқари, соғлиқни сақлаш ва вилоят санитария-эпидемиологик осойишталик маркази мутахассисларидан иборат 4 та тезкор мобил бригадалар ташкил этилиб, шай ҳолатга келтирилган. Вилоят санитария-эпидемиологик осойишталик маркази вирусология лабораторияси ЎРИ ва грипп касалликларининг 11 турига текшириш учун диагностикумлар билан таъминланган.

Шунингдек, марказ томонидан Самарқанд шаҳридаги 10 та йўловчи ташиш фаолияти билан шуғулланадиган ташкилотларда ва автотранспортларда (250 та автобус, 285 та «Дамас» ва 310 та такси), Хитой Халқ Республикасидан қайтган 102 нафар фуқароларнинг хонадонларида, 8 та мактабгача таълим муассасаларида, 35 та мактабларда профилактик дезинфекция тадбирлари олиб борилган. Самарқанд шаҳридаги мавжуд бозорларнинг барчасида, туристик объектларнинг 22 тасида, 36 та меҳмонхона ва 14 та ётоқхона ҳамда 22 та ресторан, 28 та умумий овқатланиш шохобчаларида ҳам профилактик дезинфекция тадбирлари ўтказилди.

Туман СЭО марказлари томонидан ҳам жойларда профилактик дезинфекция тадбирларини ўтказиш ишлари давом эттирилмоқда. Қолаверса,  туманлардаги 14 та автошоҳбекатлар (105 та автобус, 85 та «Дамас», 66 та такси), 22 та бозорлар, 42 та ресторан, 59 та умумий овқатланиш шохобчаси ҳамда Хитойдан қайтган 250 нафар фуқаронинг уйлари ва ҳовлиларида профилактик дезинфекция тадбирлари ўтказилган.