Соғлиқни сақлаш вазирлиги ташаббуси билан Тошкент шаҳрида соғлиқни сақлаш соҳасида биринчи Халқаро инвестициявий форуми бўлиб ўтмоқда. Бу ҳақда Соғлиқни сақлаш вазирлиги Жамоатчилик билан алоқалар бўлими хабар қилди.

Форумда Россия, Хитой, Франция, Греция, Ҳиндистон, Беларусь, Эрон, Бирлашган Араб Амирликлари, Малайзия ва яқин қўшниларимиз – Қозоғистон, Тожикистон ва Озарбайжон сингари ўндан зиёд мамлакатлардан хорижий компаниялар ҳамда Ўзбекистон тиббиёт ва фармацевтика саноати вакиллари фаол иштирок этишмоқда.

Форумда қайд этилишича, бугунги кунда соғлиқни сақлаш соҳасида инвестицияларни жалб этишга алоҳида эътибор қаратилиб, умумий қиймати 600 миллион АҚШ долларидан зиёд 17 истиқболли сармоявий лойиҳа ишлаб чиқилмоқда. Лойиҳа ташаббускорлари билан биргаликда жами 23 миллион АҚШ долларига тенг тўртта инвестиция лойиҳасини амалга ошириш бошланди. Жумладан, Туркиянинг «Cani Med Health» компанияси сармоядорлари билан биргаликда лаборатория марказини, Ҳиндистоннинг «Pratiksha Hospital Group» билан ҳамкорликда кўптармоқли  марказни ташкил этиш, «Khalifa Bin Zayed AI NahyanFoundation» араб компаниясикўмагида “Она ва бола” клиникасини қуриш ва жиҳозлаш, Германиянинг KfW банки томонидан эса минтақавий тиббиёт марказларини замонавий тиббий ускуналар билан жиҳозлаш каби лойиҳалар изчил амалга оширилмоқда. Айни пайтда хорижий сармоядорлар иштирокида нафақат пойтахтда, балки мамлакатнинг барча ҳудудларида 50 га яқин йирик хусусий тиббиёт муассасалари ташкил этилган.

Таъкидланишича, 2018 йилда соғлиқни сақлаш соҳасидаги халқаро молия институтлари кўмагида 24 млн. АҚШ доллари олтита лойиҳани амалга оширишга сарфланган. 2019 йилда бу кўрсаткич бир неча бараварга ошиб, йил охиригача 110 млн. АҚШ доллари қийматида саккизта лойиҳа амалга ошириш кўзда тутилган.

Ўтган йилда фармацевтика саноатида 96 млн. АҚШ долларига тенг 34 та инвестициявий лойиҳа, шу жумладан, 7 та эркин иқтисодий зонада 61 млн. АҚШ доллари қийматидаги 8 та лойиҳа амалга оширилди. Бундан ташқари, ушбу зоналарда 169 миллион АҚШ долларига тенг 30 лойиҳани амалга ошириш ишлари олиб борилмоқда. Жорий йилда жами 485 миллион АҚШ долларига тенг инвестиция лойиҳалари амалга ошириш режалаштирилмоқда.

Тадбир иштирокчилари томонидан Ўзбекистонда соғлиқни сақлаш тизимини ривожлантириш истиқболлари, соғлиқни сақлаш ва фармацевтика саноатининг сармоявий салоҳияти, давлат-хусусий сектор ҳамкорлиги асосида саноат ривожлантириш ва Ўзбекистонда тиббий туризмни йўлга қўйиш масалалари ҳам муҳокама қилинди.

Форум доирасида B2B ҳамкорлик кооперацияси биржаси ҳам бўлиб ўтади. Шунингдек Соғлиқни сақлаш вазирлиги томонидан «Ўзэкспомарказ»да «Соғлиқни сақлаш – TIHE 2019» 24 – Халқаро соғлиқни сақлаш кўргазмаси ташкил этилиб, унда 22 мамлакатдан 250 компания ва маҳаллий ишлаб чиқарувчилар тиббий жиҳозлар, лабораториялар, фармацевтик ва стоматологик асбоб-ускуналар, дори-дармон маҳсулотлари билан иштирок этишмоқда.