Андроид қурилмалар учун Xabar.uz мобил иловаси. Юклаб олиш ×
IOS qurilmalar uchun Xabar.uz mobil ilovasi. Юклаб олиш ×

«Пропискаси йўқнинг ўрни ҳали ҳеч қачон бунчалик чиройли кўрсатилмаган» — Мактабларга қабул қандай бўлмоқда?

«Пропискаси йўқнинг ўрни ҳали ҳеч қачон бунчалик чиройли кўрсатилмаган» — Мактабларга қабул қандай бўлмоқда?

Фото: «Google.com»

Халқ таълими вазирлиги Тошкент шаҳрида 1-синфга қабул бўйича кўп бериладиган саволларга жавоб қайтарди. Саволлар асосан 81 та «элитний» мактаб бўйича бўлган ва Daryo — LIVE улардан бирига алоҳида эътибор қаратди.

«81 та «элитний» мактаб ҳақида биласиз — уларга аввало мактабнинг микроҳудудида яшайдиган болалар қабул қилинади, мактабда жой ортиб қолса, қўшимча квота асосида ўқувчилар қабул қилинади.

Дейлик, «элитний» 50-мактабнинг микроҳудудида оилангиз билан яшайсиз, фақат пропискангиз доимий эмас, вақтинчалик. Хўш, вақтинчалик пропискага эга шахслар нима қилиши керак?

«Вақтинчалик пропискага эга шахслар қолган 228 та давлат ва 40 та нодавлат мактаб муассасаларига ҳужжат топширишлари мумкин», — деб ёзади Халқ таълим вазирлиги ахборот хизмати. Ғаройиб жавоб.

@kurbanoffnet киноя билан ёзганидек, «пропискаси йўқларнинг ўрни ҳали ҳеч қачон бунчалик чиройли қилиб кўрсатиб қўйилмаганди». Тушунгинг ҳам келади — бу чора, масалан, 50-мактаб атрофида «вақтинчалик прописка бозори» юзага келмаслиги учун қилинган, дейлик. Лекин барибир ғалати, қандайдир ёқимсиз», — дея хулоса қилади Daryo — LIVE.

Прописка масаласи кенг жамоатчиликни қийнаб келаётган муаммолардан ҳисобланади. Мамлакат ривожи учун бу тизимни бекор қилиш кераклиги ҳақида кўп фикр-мулоҳазалар билдирилган. Хусусан, ҳуқуқшунос Хушнудбек Худойбердиев «Менинг фикрим» жамоавий мурожаатлар порталига Тошкент шаҳри ва Тошкент вилоятида доимий прописка режимини бекор қилиш тўғрисида петиция жойлаган эди. Аммо ушбу мурожаат рад этилган.

«Петиция овозга ҳам қўйилмади. Бошқача айтганда менинг фикрим «туғилмаёқ бўғилди».

Рад қилишнинг асоси сифатида баландпарвоз гаплар ёзилган. Айтишларича, доимий пропискани соддалаштириш бўйича кўп ишлар қилинаётган эмиш, шу сабабли менинг петициямни эълон қилиш рад этилганмиш.

Ваҳоланки, мен пропискани соддалаштиришни эмас, бу тизимни бутунлай бекор қилишни сўраганман. Бу иккаласи мазмунан бошқа-бошқа нарсалар эканлигини тушуниш қийин эмас», — дея ёзган эди Хушнудбек Худойбердиев.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг