Андроид қурилмалар учун Xabar.uz мобил иловаси. Юклаб олиш ×
IOS qurilmalar uchun Xabar.uz mobil ilovasi. Юклаб олиш ×

Кичик бизнес тақдири — Россияга кетган маъқулми ёки тадбиркорлик қилишми?

Кичик бизнес тақдири — Россияга кетган маъқулми ёки тадбиркорлик қилишми?

Фото: Xabar.uz

Ҳудудлар учун кичик ишлаб чиқаришнинг аҳамияти жуда катта. Биринчидан, бундай корхоналарда аҳолининг кам таъминланган, «темир дафтар»даги қисмини иш билан таъминлаш мумкин. Энг муҳими эса, улар тўлаган солиқ маҳаллий бюджетга йўналтирилади. Демак, яна кўплаб масалалар ҳал қилинади.

Аммо кичик корхоналарга ҳос муаммо —ривожланиб кетиши қийинроқ. Маблағ айланмаси кам бўлгани боис бозор ёки ижтимоий ҳаётдаги кичик тебраниш ҳам уларга катта таъсир ўтказади. Айниқса пандемия даврида бу жуда сезилди.

Самарқанд вилояти, Тойлоқ туманидаги «Аминжон Барака текстил» корхонаси иш бошлаганига кўп бўлгани йўқ. Икки йилнинг нари-берисида ишлаб турган цех фаолиятига коронавируснинг таъсири бошқалардан аввалроқ сезилди. Корхона тайёрлайдиган текстил маҳсулотларига синтетик хом-ашё тўлиғича Хитойдан келтириларди. У ерда эса 2019 йилнинг декабридаёқ вазият анча жиддий эди. Бозорга таъсир эса январ ойидан бошланди. Мартдан эътиборан «Аминжон Барака текстил» фаолияти тўхтатилди.

Орадан беш ой ўтгачгина корхона фаолиятини қайта тиклаш ишлари бошлаб юборилди. Албатта бунинг учун тадбиркор Шероз Имомов ва туман ҳокимлигининг анча саъй-ҳаракатлари керак бўлмоқда.

Тойлоқда йил давомида «Аминжон Барака текстил» каби корхоналардан 8 тасининг фаолияти қайта тикланди. Аммо бир нохуш статистика — шу қаторда яна истиқболсиз бўлган 42 та тадбиркорлик субъекти ёпилган. Нима учун? Сабаблари кўп.

Тойлоқлик Рустам Фаттоев яхши ниятлар билан «Мунис Покиза ширинликлар» МЧЖни очган эди. Аммо унга бизнес ҳамкори панд берди.

— Ўзим соҳани унча яхши тушунмайман. Шеригимнинг гапига кўниб, МЧЖ очишга қарор қилгандим. У қандолатчилик соҳасида анча тажрибали эди. Аммо иш бошлаш арафасида ҳамкоримга Россияда ишлаш учун яхши таклиф келди ва у кетишга қарор қилди. Шундан сўнг корхона иши ҳам ўз-ўзидан тўхтаб қолди, — дейди Рустам Фаттоев.

Шу тариқа ҳали иш бошлашга ҳам улгурмаган корхона ёпилишга маҳкум бўлди. Бундай мисоллар юртимиздаги ҳар бир вилоят ва туманларда исталганча топилади.

Аслини олсак, Ўзбекистонда бизнес юритиш учун жуда қулай муҳит яратилмоқда. Ҳатто бу борада рейтинглардаги ўрнимиз кўтарилиб бормоқда. Хусусан, Жаҳон банкининг «Бизнес юритиш 2020» (Doing Business 2020) йиллик рейтингида Ўзбекистон 2019 йил якунлари бўйича 100 балдан 69,9 балл тўплаб, 190 мамлакат орасида 69-ўринни эгаллади. Яъни, бир йил аввалги рейтингга нисбатан мамлакат 76-ўриндан 7-ўринга кўтарилди.

Ишончимиз комил, бир йил ўтгач Ўзбекистон бу рейтингда яна кўтарилган бўлади. Аммо ҳамма гап шундаки, олиб борилаётган ишлар тарғиботи ҳам йўлга қўйилиши керак. Ҳокимликлар шундай ишласинки, юртдошларимиз Россияга кетишдан кўра, ўзимизда ишлашни маъқул кўришсин.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг