Андроид қурилмалар учун Xabar.uz мобил иловаси. Юклаб олиш ×
IOS qurilmalar uchun Xabar.uz mobil ilovasi. Юклаб олиш ×

Каттақўрғон тумани ҳокими: «Муаммолар ортида ишсизлик ва етишмовчилик ётибди»

Каттақўрғон тумани ҳокими: «Муаммолар ортида ишсизлик ва етишмовчилик ётибди»

Фото: «Zarnews.uz»

Самарқанд вилоят телерадиокомпаниясида ўтказилган «Очиқ мулоқот»  кўрсатувида Каттақўрғон тумани ҳокими, сектор раҳбарлари, тумандаги корхона ва ташкилотлар раҳбарлари иштирок этди. Аҳолидан тушган мурожаатларни таҳлил қилар экан туман ҳокими Аъзамхон Баҳромов қуйидаги фикрларни билдирди, деб ёзмоқда «Zarnews.uz».

– Афсуски, Каттақўрғон иқтисодиётда саноат улуши энг кам туманлардан, – дейди ҳоким. – Бугун келиб тушаётган мурожаатларнинг аксарияти ортида ишсизлик, етишмовчилик ётибди. Афсуски, иш ўринлари яратишда ҳам кўпинча, қоғозбозликка йўл қўйилганини тан олиш керак. Бизга аввало, реал, барқарор даромад келиб турадиган иш жойлари керак. Шу сабабдан ҳам биринчи навбатда туманда саноатни, кичик бизнес ва тадбиркорликни ривожлантиришимиз лозим. Шундагина ишсизлик ва унинг ортидан келиб чиқадиган муаммоларга ечим топилади.

Мулоқот давомида келиб тушадиган мурожаатларнинг бир нечтаси ишсизлик борасида бўлган. Жумладан, Алишер Навоий номли маҳалладан А.Набижонов, Бургансой маҳалласидан О.Хидиров, Болтабек маҳалласидан Г.Бобоеванинг иш бўйича мурожаатлари ижобий ҳал этиладиган бўлди.

Туман ҳокими тўғридан-тўғри эфирда меҳнат қилишни истаган ҳар бир фуқарога албатта, шароит яратиб беришини маълум қилди.

– Ижтимоий соҳада ҳам туманимиз йиллар давомида анча ортда қолганини яширишдан фойда йўқ, – деди туман раҳбари. – Муаммони тан олиш, уни бартараф этиш устида ишлашимиз керак. Ичимлик суви муаммосини олайлик. Бугун туман аҳолисининг ичимлик суви билан таъминланиш даражасини 25 фоиз десак ҳам, 75 фоиз десак ҳам тўғри бўлмайди. Сабаби, асосий аҳоли пунктлари икки дарё оралиғида жойлашгани сабабли ер ости сувлари яқин, кўпчилик ўз ҳовлисида қўлбола қудуқ қазиб олган. «Сувоқова» фаолияти тўхтаб қолган. Биз ана шу корхона фаолиятини тикладик, шароит қилиб бердик. Сабаби, аҳолига зарарсиз ичимлик суви керак. Буни ҳаммага тушунтиришимиз зарур.

Мулоқот давомида тушган айрим мурожаатлар бўйича жавоб бериларкан, туман мутасаддилари мурожаат эгасини идорага таклиф қилиб, муаммосини ечишга ваъда берди. Туман ҳокими эса «Фуқарони ишхонамизга таклиф қилмасдан, ўзимиз унинг олдига борайлик», деди.

Мулоқот сўнгида Аъзамхон Баҳромов ўз хулосалари билан бўлишди:

– Ушбу мулоқот биз учун жуда фойдали. Сабаби биз халқ билан мулоқотнинг ҳамма йўналишларидан, шу жумладан телемулоқотлардан фойдаланиб келяпмиз. Телемулоқотнинг бир томони борки, халқ тўғридан-тўғри кўриб турибди. Мутасаддилар ҳеч нарсани яшира олмайди. Муаммони албатта, ечиш керак, вассалом! Биз учун яна бир фойдали томони қаерда, қандай муаммоларимиз кўпроқ эканини ана шу мулоқотлар орқали билиб боряпмиз.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг