2021-2022 йилларда Бухоро вилоятида туризм соҳасини қўшимча комплекс ривожлантириш чора-тадбирлари белгиланмоқда. Вазирлар Маҳкамасининг бу борадаги тегишли қарори лойиҳаси муҳокамага қўйилди.

Ҳужжат лойиҳасига кўра, Бухоро – Навоий, Бухоро – Қашқадарё, Бухоро – Хоразм М–37 ва А–380 ҳалқаро автомагистраль йўллари бўйида жойлашган бўш ер участкаларида йўл буйи туризм инфратузилмаси, хусусан кемпинг, мотель, хостел ҳамда ҳунармандлар марказлари, замонавий санитария-гигиена шохобчалари ташкил қилиш режалаштирилган.

Қайд этилишича, Бухоро шаҳрида меҳмонхоналар қуриш учун жисмоний ва юридик шахсларга тақдим этиладиган ер участкалари бўйича қуйидаги инвестиция мажбуриятлари юкланади:

• майдони 0,06 гектардан 0,15 гектаргача бўлган ер участкасини ажратишда инвесторга 50 та хонадан кам бўлмаган меҳмонхона;
• майдони 0,15 гектардан 0,3 гектаргача бўлган ер участкасини ажратишда - 100 хонадан кам бўлмаган меҳмонхона;
• майдони 0,3 гектардан 0,5 гектаргача бўлган ер участкасини ажратишда - 150 хонадан кам бўлмаган меҳмонхона;
• майдони 0,5 гектардан ва ундан ортиқ майдонга эга ер участкасини ажратишда - 200 та хонадан кам бўлмаган, 3 - 5 юлдузли тоифадаги стандартларга мос келадиган меҳмонхона қуриш.

Шунингдек, «Бухоро ихтисослаштирилган жайрон питомниги»ни 2021-2022 йиллар давомида замонавий туристик объектга айлантириш ҳам кўзда тутилган.