«Фарғона» полигонида Шарқий ҳарбий округи тасарруфидаги ҳарбий қисм ва муассасалари ўртасида ихтирочилик, рационализаторлик ва инновацион ғоялар кўргазмаси ўтказилди.

Мудофаа вазирлиги матбуот хизмати хабарига кўра, Кўргазма давомида ҳарбий хизматчилар томонидан кашф этилган ҳарбий техникалар ва қурол-аслаҳаларнинг тактик-техник хусусиятларини янада такомиллаштиришга хизмат қилиши мумкин бўлган қурилмалар, ихтиролар намойиш этилди, фойдаланишда қулайлик яратувчи, жанговар ва маънавий-маърифий тайёргарлик машғулотларини ўтказишда янги инновацион технологиялар ва ускунларни қўллаш бўйича таклиф ва тавсиялар берилди.

90 дан ортиқ рационализаторлик ғоялари намойиш этилган кўргазма давомида иштирокчилар ҳали ҳеч ерда қўлланилмаган илғор техникалар билан танишди. У.Матҳалилов томонидан яратилган ва полигон учун хизмат қиладиган оғир шароитларда нишонларни кўтариб тушуриш электрон мосламаси кўпчиликнинг диққат марказида бўлди.

Шунингдек, И.Ҳамидуллаевнинг макетда ўқ отиш машқини янгича усулда симуляция қилиш мосламаси, шартнома бўйича ҳарбий хизматчи оддий аскар К.Амировнинг БТР-70 техникасида ташқи кучлар томонидан эҳтимолий ёнғин содир этилганида, техника ичидан ташқарига чиқмай туриб ёнғинни ўчириш мосламаси кўпчиликда қизиқиш уйғотди.

Майор С.Очилов тақдим этган дала шароитида ахлоқий-руҳий таъминотни шакллантиришга хизмат қиладиган автоном автожамланманинг лойиҳаси ҳам йиғилганларга маъқул бўлди.

5 та йўналиш бўйича ғолиблар кейинги босқичга йўл олди, уларнинг ғояларини амалиётда қўшинлардақўллаш бўйича таклифлар киритилади.