Президент Шавкат Мирзиёев айни вақтда тадбиркорлик бўйича селектор йиғилиши ўтказмоқда. Давлат раҳбари йиғилиш давомида Қашқадарё ва Навоий вилоятларида олиб борилган ишларни кескин танқид қилди. Бу ҳақда «Xabar.uz» мухбири хабар бермоқда.

— Салоҳияти юқори бўлган Қашқадарё вилоятида кичик бизнес ишлаб чиқарган саноат маҳсулотлари ҳажми аҳоли жон бошига атиги 1,9 миллион сўмга тўғри келиб, бу – республика кўрсаткичидан 2 баравар паст.

Қашқадарёда аҳоли жон бошига йиллик хизмат кўрсатиш ҳажми, 3 миллион сўмдан ошмаган ёки бошқалардан 2 баравар кам.

Ушбу вилоятда ҳар минг нафар аҳолига тўғри келадиган кичик бизнес субъектлари сони атиги 4 та, уларда ишловчилар сони 16 нафардан иборат.

Навоий вилоятидаги 7 мингдан ортиқ тадбиркорлар (24 фоиз) муаммолар ечилмаётгани, улар фаолиятига тўсқинликлар бўлаётгани ҳақида мурожаат қилган. Бу – ҳудудлар ичида энг салбий кўрсаткич.

Навоийдаги жами 10 та кичик саноат зонасининг 72 гектар ёки 66 фоиз ерига бирорта лойиҳа жойлаштирилмаган, — деди Президент.

Шунингдек, йиғилиш давомида давлат раҳбари Навоийда ҳар бир кичик бизнес субъекти томонидан йилига 1 миллиард сўмлик маҳсулот ишлаб чиқарилиб, солиқ тушуми 30 миллион сўмни ташкил этганини таъкидлаб ўтди. Солиштириш учун, Андижон, Жиззах ва Самарқандда йилига 2 миллиард сўмлик маҳсулот ишлаб чиқилган бўлса, 50 миллион сўм солиқ тушуми амалга оширилган.