Президентнинг 2019 йил 15 мартдаги қарори билан Вазирлар Маҳкамаси ҳузурида Агросаноат мажмуи устидан назорат қилиш инспекцияси ташкил этилган эди.

“Ўзагроинспекция” янги низоми тасдиқланди. Унга бир қатор вазифалар, ваколатлар юклатилган.

Хусусан, экспорт-импорт ва республика ичидаги ташишларда пахта хом ашёси, бошоқли дон ва бошқа қишлоқ хўжалиги экинлари ҳосили ва уларнинг уруғлари ҳамда улардан қайта ишланган маҳсулотлар сифатини мажбурий давлат текширувини ўтказиш масалалари ҳам инспекция томонидан амалга оширилади.

Қишлоқ хўжалиги тизимида ҳуқуқбузарликларни аниқлаш, уларнинг келиб чиқиши сабаблари ва шарт-шароитларини бартараф этиш чораларини кўриш ва қонун ҳужжатларида белгиланган тартибда маъмурий ҳуқуқбузарликлар тўғрисидаги ишларни юритиш ҳам айнан инспекция томонидан бажарилади.

Эндиликда қишлоқ хўжалигига мўлжалланган ерларни фермер, деҳқон хўжаликларига ва бошқа қишлоқ хўжалиги корхоналарига қишлоқ хўжалиги мақсадлари учун, шунингдек, юридик ва жисмоний шахсларга ноқишлоқ хўжалиги мақсадлари учун ер участкаларини ажратиш бўйича қонун ҳужжатларида белгиланган талаблар бузилишининг олдини олишга доир комплекс чора-тадбирлар амалга оширилади.

Ерлардан қатъий равишда мақсадли фойдаланиб, суғориладиган экин майдонларини муомаладан чиқарилишига йўл қўйилмайди. Қишлоқ хўжалиги маҳсулотлари етиштириш бўйича қабул қилинган шартнома мажбуриятларига риоя этилиши таъминланади.

Низомга асосан инспекция ваколатига тааллуқли ишлар бўйича текшириш ўтказиш ваколатига ҳам эга бўлди. Жумладан, қишлоқ хўжалиги ерларидан нооқилона фойдаланиш ва уларни қўриқлаш, сув ресурслари исрофгарчилиги, минерал ўғитлар ва ёқилғи-мойлаш материалларини ўғирлаш, гидротехника, мелиорация иншоотлари ҳамда қишлоқ хўжалиги техникасидан хўжасизларча фойдаланиш ҳолатларини аниқлайди.

Шунингдек, норматив ҳуқуқий ҳужжатлар талаблари бузилишига йўл қўймаслик ҳақида мансабдор шахсларни огоҳлантиради. Соҳада қонун бузилиши ҳолатларини ҳамда уларни келтириб чиқарувчи сабаб ва шарт-шароитларни бартараф этиш юзасидан ўз ваколатлари доирасида идоравий бўйсунувидан ва мулкчилик шаклидан қатъи назар, корхона, муассаса ва ташкилотларга ижро этилиши мажбурий бўлган тақдимномалар киритади.

Бундан ташқари, сувдан фойдаланувчилар ва сув истеъмолчилари томонидан сув олиш тартибини бузганлик учун жарима санкцияларини ҳам қўллайди.