«Мен мардман! Биттада тўлайман!»

Қўлга тушгандан кейин қилинадиган бунақа «жўмардлик»нинг қуввати қоладими? Хўп, шунақа мард экансан, панада яшириниб юришга бало бормиди, деворасан-да.

Фуқаролик ишлари бўйича Денов туманлараро суди қарорига кўра (2017 йил 26 январь) шўрчилик У. А.  зиммасига бир нафар вояга етмаган фарзандининг моддий таъминоти учун алимент тўлаш белгиланганди.

Суд ҳужжати қонуний кучга кириб, ижрога — Мажбурий ижро бюросининг Шўрчи туман бўлимига ўтганидан кейин отагинанинг изи йўқолсами?! Бўлим ходимлари уйига келди, маҳалласидан суриштирди: йўқ, йўқ... Натижада унга нисбатан қидирув қарори қабул қилинишдан бошқа чора қолмади.

Расмий қидирув эълон қилинганидан кўп ўтмай У. А.нинг қаерда экани аниқланиб,  давлат ижрочиларига топширилди.  Давлат ижрочилари  унга алимент қарздорлигини ҳисоблаб, тўлаб қўйиш шартлигини, акс ҳолда тўпланган ҳужжатлар судга оширилиб, 15 сутка «ўтириши» мумкинлигини яхшилаб тушунтирдилар.

«Мен мардман! Биттада тўлайман ҳаммасини!» деди қарздор ота.

Жуда яхши. Қани, ҳаракатингизни бошланг...

Қарздор У.А. собиқ турмуш ўртоғи билан ўзаро келишди. Фарзандининг вояга етгунга қадар бўлган жами алимент миқдорини ҳисоблаб, биттада тўлади: 75 миллион сўм!

Қутилдими? Албатта.

Фарзанди олдидаги маънавий қарздорлик-чи? Бу энди унинг ўзига тан.

Инсофини берсин.