Қаршида бахтсиз ҳодиса юз берган қурилиш объекти ноқонуний бўлган - вазирлик
23 июнь куни Қаршидаги «Насаф Травел» меҳмонхонаси биносининг ўнг томонидан қўшимча қурилаётган 5 қаватли янги қурилиши якунланмаган бинонинг том қисмидаги том ёпма қурилмаси (бетон плита) қулаб тушган ва бир киши вафот этганди.
Ўзбекистон қурилиш вазирлигининг ахборот хизматига кўра, Қашқадарё вилоят қурилиш соҳасида ҳудудий назорат инспекцияси ўрганиш ишлари олиб борганида, «Насаф-Травел» компаниясига тегишли ушбу объектидаги қурилиш ишлари рўйхатга олинмасдан, ноқонуний олиб борилгани маълум бўлган.
Буюртмачи «Насаф Травел» компанияси Ўзбекистон Республикаси Вазирлар Маҳкамасининг 2018 йил 18 майдаги «Архитектура ва қурилиш соҳасида давлат хизматлари кўрсатишнинг айрим маъмурий регламентларини тасдиқлаш тўғрисида»ги қарорининг, 5-иловаси, яъни, «Қурилиш-монтаж ишларини бошлаш ҳақида хабарнома юбориш бўйича давлат хизматлари кўрсатишнинг маъмурий регламенти»га мувофиқ, Қашқадарё вилоят қурилиш соҳасида ҳудудий назорат инспекциясини хабардор этмаган.
Шунингдек, объект қурилиши бўйича, Қарши шаҳар ҳокимининг 2018 йил 5 июндаги «Насаф-Травел» компаниясига тегишли 4566,92 кв.м ер майдонида жойлашган «Меҳмонхона ва ресторан»ни реконструкция қилишга ҳамда ўз ҳудудидан ёрдамчи бинолар қуришга рухсат этиш тўғрисида”ги қарори билан, «объект атрофини тоза сақлаш, ободонлаштириш ва кўкаламзорлаштириш ишларини доимий бажариш ҳамда объектда қурилиш-монтаж ишларини амалга ошириш учун вилоят давлат архитектура қурилиш назорати инспекциясидан рухсатнома олиш юклатилган» бўлсада, буюртмачи «Насаф-Травел» компанияси ушбу талабни бажармаган.
Инспекция томонидан ушбу объект қурилиши бўйича «Насаф-Травел» компаниясини бир неча бор огоҳлантирган бўлишига қарамасдан, ноқонуний равишда объектда қурилиш-монтаж ишларини давом эттирган. Ва қурилиш меъёрларининг қўпол равишда бузилиши оқибатида мазкур ҳолат келиб чиққан. Тадбиркорлик субъекти қонунда кўрсатилган эркинликларни суистеъмол қилган. Ноқонуний қурилиш ишларини амалга оширган.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter