Олий Мажлис Қонунчилик палатаси депутати Расул Кушербаев синовли кунларда ҳам «UZAUTO MOTORS» тез ёрдам учун ҳам автомобилларини оширилган нархида сотаётганини танқид остига олди.

«Айтганча, шу синовли кунларда юртдошларимизга енгил бўлиши учун барча қўлидан келгунча дори дармон, тиббий ускуналар олиш учун ўз ёнидан хайрия қилаётган ёки беминнат хизмат кўрсатаётган бир вақтда, бизнинг эркатой монополимиз «Ўзавтомоторс» юзи қизармай, тез ёрдам учун ҳам автомобилларини отни калласидек оширилган нархида сотишда давом этяпти.

Масалан, Фарғона вилояти ҳокимлиги вилоят аҳолиси учун 20 та янги «Дамас»ни 75 млн. сўм атрофида сотиб олиб, «тез ёрдам»га топширибди.

Шу «Ўзавтомоторс»га ҳам ҳайронсан. Россиянинг Уфасида автомобиллари очиқда қолиб, чириб ётса ҳам, ўз халқи учун жилла қурса «Дамас»ларидан бепул ёки имтиёзлар билан бериш қийинми?

«24 йил давомида халқимиз билан биргамиз», деб кўкрагини кераётган бу монопол ҳеч бўлмаса шу оғир кунларда ҳақиқатан халқи билан бирга эканлигини исботласа бўларди.

Ахир шунча йил шу халқ ҳисобидан ялло қилиб яшади, эртага шу халқ бўлмаса унинг «эрка»лигини ким кўтаради, дефектлар билан чиқаётган, отни калласидек қиммат машиналарини ким олади, албатта, шу халқ олади. Пулини тўлаб ойлаб кутадиган Россия, Қозоғистон, Украина халқи эмас, шу халқ олади, шу халқ минади. Шу касал бўлаётган одамлар бўлмаса ҳеч кимсан «монопол дўстим»!», дейди Расул Кушербаев.